നടീനടനാടകം

 2, 8 എന്നീ സ്ഥാനങ്ങളിൽ ഒരേ അക്ഷരം ആവർത്തിക്കുന്നു.

കത്തുമാശകളൊരിത്തിരിയുണ്ടേ

ചിത്തമേടയിലകത്തൊരു കോണിൽ

സ്വത്തതെൻ, മിഴിവിലൊത്തു നിരത്തി

മുത്തുപോലവ കൊരുത്തൊരു ഹാരം!

വിട്ടുപോയ് മനമലട്ടിയ ശങ്ക

കെട്ടിനിന്നൊരണപൊട്ടിയ ധാര

ഒട്ടുമില്ല, കരുതട്ടെ വിഘാതം

തൊട്ടിടാൻ കരുണകാട്ടുമൊരാഴി

നീക്കി കന്മഷമെഴുക്കു മുഴുക്കെ

വാക്കിനിന്നറുതി, നാക്കിനു മൗനം

ചേക്കുപോലെ മനമോർക്കുവതിന്നോ

ദിക്കിനേ വസനമാക്കിയ രൂപം

തൃപ്പദം നിനവുരാപ്പകലായി

അപ്പൊഴേ ഹൃദയദർപ്പമകന്നൂ

വീർപ്പു കൊണ്ടു ജപമാപ്പൊരു,ളുള്ളിൽ

തപ്പിടും തുടിമിടിപ്പൊരു താളം

സച്ചിദംബരമുറച്ചൊരു ബിംബം

വെച്ചു കാമനയെരിച്ചൊരു ദീപം

കച്ചരങ്ങളുമൊഴിച്ചൊരു നേരം

പച്ചയായകമുദിച്ചൊരു ബോധം

കില്ലുമാറിയലതല്ലുമൊരുള്ളം

നല്ല ബോധമതിലുല്ലലമാടീ

ചില്ലിലൂടെ മഴവില്ലൊളി തൂകു-

ന്നില്ലെയേഴഴകു ഝില്ലിയൊരേകൻ!

പിഞ്ചിളം ശശികലാഞ്ചിതമാസ്യം 

ക്രൗഞ്ചരാജസുത തഞ്ചുമിടത്തായ്

പഞ്ചബാണരിപു പുഞ്ചിരി തൂകെ

അഞ്ചുമെന്നഴലു കിഞ്ചനവേണ്ടാ

അങ്ങയിൽ വിലയമങ്ങയിലുദയം

തങ്ങി ലോകചലനങ്ങളതൊക്കെ

അങ്ങു താണ്ഡവനടങ്ങളുതിർക്കേ

അങ്ങയിൽ പകുതിവാങ്ങിയ ലാസ്യം

ഉത്തമാംഗന പകുത്തൊരുദേഹം

നർത്തനാലസിതനിത്തരുണത്തിൽ

ഹൃത്തടത്തിലൊരു പുത്തനുണർവിൻ

മൂർത്തമാം നടമുണർത്തിയതത്വം 

വൃത്തം : സ്വാഗത
പ്രാസം : അഷ്ടപ്രാസം

പദപരിചയം

ചേക്കു് - അഭയസ്ഥാനം

കച്ചര - അഴുക്കു്/മുഴിഞ്ഞ/ദുഷിച്ച

കില്ലു് - ക്ലേശം

ഝില്ലി - സൂര്യപ്രകാശം

ക്രൗഞ്ചം - പർവതം

അഞ്ചുക -  ഭയപ്പെടുക/നടുങ്ങുക

കിഞ്ചന - ഒട്ടുംതന്നെ/ഒരുവിധത്തിലും

മൂർത്ത -  കാണത്തക്കതായ

നടീനടനാടകം എന്നു കേൾക്കുമ്പോൾ ഓർക്കേണ്ടതും ഓർമ്മവരേണ്ടതും മഹിഷാസുരമർദ്ദിനി സ്തോത്രമാണു്.  നടിതനടാർദ്ധ - നടീനടനായക - നാടകനാടിത - നാട്യരതേ.  ഒരുപകുതിയിൽ നടനായും മറുപകുതിയിൽ നടിയായും അർദ്ധനാരീശ്വരരൂപത്തിൽ വിശ്വലീലയാകുന്ന നാടകമാടി അതിൽ രമിക്കുന്നവളേ. ശിവനു് താണ്ഡവമാണെങ്കിൽ ദേവിക്കു ലാസ്യമാണു്.  അതുരണ്ടും സമന്വയിപ്പിച്ച നടനമാണു് വിശ്വലീല.

സ്വാഗതയ്ക്കു രനഭം ഗുരുരണ്ടും