സുന്ദരം ശുഭചിന്തപൂത്തു നിതാന്തമോഹനകാന്തിയിൽ
നന്ദനം സ്ഫുടവൃന്ദമാൽ, ഹൃദയാരവിന്ദമരന്ദവും
സ്പന്ദനം, തുടിയന്തരാളമൃദംഗമായ് മൃദുമന്ത്രണം
ചന്ദനപ്രിയഗന്ധതുന്ദില മന്ദമാരുതചാമരം
(നന്ദനം - ഇന്ദ്രന്റെ പൂന്തോട്ടം സ്ഫുടം - വിടര്ന്ന പൂക്കളോടെ നില്ക്കുന്ന മരം തുന്ദില - വഹിക്കുന്ന)
ശംബരദ്യുതിയംബരീഷണബിംബമേകി തെളിച്ചമായ്
അംബകം മറമൂടിടും മിഴിനീരിലൻപൊടു ചുംബനം
കംബരസ്മിതരശ്മിയായ് വരുമശ്രുബിന്ദുവിലാ കതിർ
അംബരം പടരുമ്പൊഴോ വരുമിമ്പമായ് മഴവില്ലൊളി
(ശംബര - ഉത്തമ/ശ്രേഷ്ഠമായ അംബരീഷണൻ - സൂര്യൻ അംബകം - കണ്ണ് കംബര - പലനിറമുള്ള )
ഉന്മുകം, നിറവെൺമതിപ്രതി, വാങ്മയം തമഭഞ്ജനം
കന്മഷം കരികന്മതിൽ ദൃഢവന്മതിൽ തകരും മടം
പൊന്മനം നിറനന്മപൂത്തതു തിന്മയസ്തമയം മണം
സന്മനസ്സിലെ തന്മ തന്നിനിമയ്ക്കുതാൻ ദിനമുൻമുഖം
(ഉന്മുകം - പന്തം പ്രതി - പോലെ/സദൃശം വാങ്മയം - വാക്സ്വരൂപം/പദപ്രവാഹം മടം - അഴക് ഉന്മുഖ - ലക്ഷ്യമാക്കിയ/അതിലേക്ക് മുഖമുയർത്തിയ)
യുക്തിയിൽ വരുമുക്തികൾ സരളോക്തികൾ പ്രബലോക്തികൾ
ശക്തിതന്നു നിരുക്തമോടതു തപ്തമാനസസിക്തമായ്
വ്യക്തമാം പദപങ്ക്തിയാലെ, സമാപ്തിപൂണ്ടു വിരക്തി തൻ
തിക്തമാം നിമിഷങ്ങ,ളുത്തമ തൃപ്തിയോടെ ശുഭാപ്തിയായ്
(ഉക്തി - വാക്ക് നിരുക്തം - ശബ്ദങ്ങളുടെ നിഷ്പത്തിവിവരണം സിക്ത - നനച്ച)
ആശ്രയം പദമാം ശ്രണി, ക്ഷരമാകെ വിശ്രുതമക്ഷരം
അശ്രുതധ്വനി ശുശ്രുവാണി പകർന്നപാലിലെ മിശ്രിതം
ആ ശ്രുതം ശചി ശക്വരത്തിലെ
ശാണശാണിതമീണമാ-
ക്കാൻ ശ്രമം ശതതന്ത്രിമീട്ടിയ ശർമിപോൽ ശൃണുവെൻ ശ്രുതി
(ശ്രണി - കൂട്ടം ക്ഷരം - പ്രകൃതി വിശ്രുത - ഒഴുകുന്ന അക്ഷരം - നാശമില്ലാത്തത് ശുശ്രു - അമ്മ ശ്രുതം - പഠിത്തം ശചി - വാഗ്മിത്വം ശക്വരം - വിരൽ ശാണശാണിതം - ഉരകല്ലിലുരച്ച് മൂർച്ച കൂട്ടിയ ശർമി - സന്തുഷ്ടിയുള്ള)
നെഞ്ചിലോ കിളിപഞ്ചമംവിളി, കൊഞ്ചിശാരിക മഞ്ജുളം
തഞ്ചിടും ശ്രുതിതന്ന വാഞ്ഛയിലുള്ളിലായ് കവിലാഞ്ഛനം
കുഞ്ചികത്തിരി മഞ്ജുഭാവന കുഞ്ചമിട്ടൊരു മഞ്ജുഷ
അഞ്ചിടും പദകഞ്ചകാന്തി വിപഞ്ചിമീട്ടി സമഞ്ജസം
(കുഞ്ചികം - മുളയുടെ നാമ്പ് കുഞ്ചം - പൂങ്കൊത്ത്/കതിർക്കുല മഞ്ജുഷ - പൂക്കൂട കഞ്ചം - താമര സമഞ്ജസം - ഉചിതമായതിൽ നിന്നും മാറാതെ)
സത്യമോ? പദമൗക്തികം തരുമത്യയിദ്യുതിയുത്കടം
നിത്യനിർവൃതിപൂത്തവാടി വിഹൃത്യഭാവന തഥ്യയോ
മർത്യമാനസവൃത്തികൾക്കമരത്വമായി നിപാത്യമാം
കൃത്യചിന്തന വിത്തുപാകി വളർത്തിയൊക്കെ വിടർത്തിയോ
(മൗക്തികം - മുത്ത് അത്യയി - കവിയുന്ന വിഹൃത്യ - വികസിപ്പിച്ച നിപാത്യ - നിപതിപ്പിക്കപ്പെട്ട കൃത്യ - ശരിയായ)
വൃത്തം : മല്ലിക
പ്രാസം : അനുപ്രാസം