ഒരുമയിലോണം

ഒരുമയിലോണം എന്നുപറയുമ്പോൾ ഒരുമയിൽ ഉള്ള ഓണമാണോ അതോ ഒരു മയിൽ ഉള്ള ഓണമാണോ.

അരചനൊരാൾ പ്രബലൻ സരസാത്മൻ

ദുരയണിയാ പ്രകൃതം സ്ഥിരധർമ്മം

കരബലമാൽ പ്രഭവം കരണീയം

ധരണിതലം പ്രഭുവായ് ചിരകാലം

ബലി ബലവാനാണുലകിനു മന്നൻ

വലിമയിലെന്നും തലയുയരേ താൻ

അലിവറിവുള്ളോൻ പരിമിതിയില്ലാ

വലിയമനസ്സിന്നുടമയുമാണേ

മികവൊടെ ഭരണം  കൈകളതമലം

സകലവിജയിയായ് ശ്രീകരഭുവനം

തികവൊടെ ഭവനം നാകവിരചിതം

പക വെറി കലഹം ശോകവിനശനം

നയനമനോഞ്ജം നിഖിലനികേതം

പ്രിയകരമായി പ്രജനൃപബന്ധം

സ്വയമവിടെങ്ങും നിയമവിലാസം

നിയതിവശാൽ സൌഭഗമതു പൊയ്പ്പോയ്

മഴയൊഴിയും സമയം മലനാട്ടിൽ

പഴയ നൃപൻ വരുമന്നിവിടോണം

അഴലകലും സ്മൃതിയിൽ പുതുവെട്ടം

അഴകണിയും വനിപോൽ തിരനോട്ടം 

കതിരുകളാടിയ നെൽവയലെല്ലാം

പുതിയൊരു നാളെയുടാഗമനം പോൽ

പൊതിയുകയായ് പുതു പൂങ്കനവോലും

അതിശയമേദുരവർണ്ണവിതാനം

പൊലി പൊലി പൊലിയോ പൂപ്പൊലിപൊലിയോ

പൊലിമയിലുലകം പൂവിളിയുയരും

ബലി വരുമതിനാൽ ഭൂവിനു പുളകം

കലികകളിനിമേൽ പൂവിടുമധികം

ഇരുമയെയോണം പരിചൊടു ചേർത്തി-

ട്ടൊരുമയിലല്ലോ നടമിടുമല്ലോ

വരുമുറവിൻ പൈമ്പുഴയുടെ തീരം

ഒരു മയിലല്ലോ നടമിടുമല്ലോ

പല നിറമണിയും പൂവിതളുകളും

വിലസിതമവയിൽ ദ്യോവിലെയഴകും

സുരതരുകുസുമം മോടിയിലിനിയാ-

സുരനൃപനണയേ സ്വാഗതമരുളും

നവയുഗനിയതം സാർത്ഥകനിരതം

ഇവിടൊരുനിയമം നീതിയിലൊരുപോൽ 

സമതരഭരണം  വ്യാപൃതമഖിലം

സുമധുരവിധമായിനി വരുമോ ചൊൽ

വൃത്തമാലിക

1. നനതനഗുരുവും മംഗളഫലകം

2. ലളിതപദം നജജം യഗണാഢ്യം.

3. നയ നയ വന്നാൽ കുസുമവിചിത്രാ