അരുണമണി

അതിശക്വരി (15) എന്ന ഛന്ദസ്സിൽ ഉൾപ്പെട്ട ഒരു സമവൃത്തമാണ് #ശശികലാ. തുടർച്ചയായി 14 ലഘുക്കളും ഒടുക്കം ഒരേയൊരു ഗുരുവും ചേർത്താൽ #ശശികല ആയി. കാകളി വൃത്തത്തിന് പല ഭേദങ്ങളുണ്ട്. ആദ്യഗണത്തിൽ 5 ലഘു അക്ഷരങ്ങൾ കൊണ്ട് 5 മാത്രയും പിന്നെ 3 അക്ഷരങ്ങൾ കൊണ്ട് 5 മാത്രയും പിന്നെ 5 ലഘുക്കളെക്കൊണ്ട് 5 മാത്രയും പീന്നെയും 3 അക്ഷരങ്ങൾ കൊണ്ട് 5 മാത്രയും കൊടുക്കുന്ന രീതി #മിശ്രകാകളി എന്ന് അറിയപ്പെടുന്നു. മിശ്രകാകളിയും ശശികലയും ചേർത്ത വൃത്തമാലികയാണിത്.

അരുണമണി പോലതാ വരുമഖില ദീപമായ് 

തിരുവുടയ ബിംബമായുദയഗിരി മേലെയായ്

ഇരുളിനല മാറ്റിടാൻ പ്രഭ നിറയെ തൂകിടാൻ

ഒരു പുതിയ വാസരം ശുഭമഹിത ഭാസുരം

പുളിനകമനഹരിതതടമതതിശയം

തളിരു നിറയെ മെഴുകുമിനി ശബളിമ

നളിനി മുകളിലളിവലയ നിരകളും 

കിളികളരുളി കുറുകുമൊലി സരിഗമാ

തരുണിയരുവിയഴകൊഴുകി മിഴിവൊടേ

തരുണനരുണനൊരു കുസൃതി, പുഴ തൊടാൻ

അരുവി തരളപുളകവതി തുടുനിറം

അരുമ ചിതറി കൊലുസിനൊലി പധനിസാ

അനവരത രശ്മികൾ കരവിരുതു് കാട്ടിയോ

കനകമയ ദീപ്തികൾ കലിക തല നീട്ടി പോൽ

വനലതിക പൂക്കയായ് വിവിധ സുമരാജികൾ

വനജ നറു സൗരഭം വിപിന തതി സൗഭഗം 

ഉദിത വിവിധ കുസുമനിര പലതരം

സുദിനമണയെയനിലനുടെ വിലസലായ്

സ്വദിത മുദിതമരുളിയൊലി മുളകളിൽ

സദിരുമൊഴുകി വനമുരളി കളരവം

  

കതിരു പകരുമുയിരിനൊളി നിറയവേ

ദ്യുതിത സകലഭുവനമിനി മധുവനം

പതിവു കുതുകഹൃദയതുടി മൊഴിയുമാ

പുതിയ കവിത സരിഗമപ പധനിസാ

വൃത്തമാലിക

പല്ലവി: മിശ്രകാകളി

ഇച്‌ഛ പോലെ ചിലേടത്തു ലഘുപ്രായഗണങ്ങളെ ചേർത്തും കാകളി ചെയ്‌തിടാമതിൻപേർ മിശ്രകാകളി.

ഉദാഃ ജനിമൃതിനി/വാരണം/ജഗദുദയ/കാരണം

ചരണനത/ചാരണം/ചരിതമധു/പൂരണം

ചരണം: ശശികല 

നഗണയുഗളയുഗമൊടു സ ശശികലാ